زى ما كل الناس اتكلمت عن كورونا وطرق انتقال العدوى وطرق الوقاية منه .. انا هتكلم عن الوسواس اللى لاحظته مؤخرا ف ناس كتير حواليا منهم صحابى وقرايبى ف سن العشرينات والاربعينات ومنهم مسنيين تتراوح اعمارهم من 50 سنة الى 80 سنة .. مكنتش اعرف ان وسواس الوهم  صابهم.. اللى يقولى هاتيلى كمامة واللى يقولى ما تسلميش ع حد اكيد ايده فيها فيروس واللى يقولى اتصرفيلى ف ازازة كحول ده طبعا بحكم شغلى ف مجال الادوية والعقاقير.. وكمان اللى بيخرج منهم بيخرج ملثم او اضعف الايمان انه يغطى وشه بمنديل حتى الست العجوزة اللى شوفت قلقها ع نفسها اكتر من قلقى ع نفسى .. وصاحبتى اللى ابتدت تشتكيلى من اعراض الاصابة بكورونا من دلوقت وانها بتكح والتانية تقول انا حاسة نفسى سخنة واللى داخلة ع الجروب تقول يا جماعة سامحونى لو زعلت حد محدش ضامن عمره وكلام من هذا القبيل .. طبعا الموضوع مقلق ومحتاج اننا ناخد حذرنا منه ونخاف ع نفسنا و ع اهلنا ونستعمل كل طرق الوقاية المتاحة وناخد بالاسباب ومانرميش نفسنا ف التهلكة  بس مش معنى كده اننا نبقي اووفر و نوهم نفسناان الفيروس محاصرنا والموت محقق لينا ونعتقد اننا مصابين ونبتدى نتصرف ع هذا الاساس.. ده غلط ف حد ذاته .. الخدعة النفسية ف صورة وهم كافية انها تمرضك باى مرض وتحسسك باعراضه كلها ودى نفس الطريقة اللى كانوا بيستعملوها ف الحروب انهم يحبسوا المعتقلين ويوهموهم انهم اكلوا اكل مسموم فيعتقدوا انهم اتسمووا وبيتدوا يحسوا باعراض اى شخص مسموم ممكن يحسها لمجرد انهم صدقوا وهمهم .. الملخص اننا نتعامل ونواجه اى شىء بيواجهنا بس نواجه بجد ونتعامل ومانهربش بالوهم او بالسلبية خير الامور الوسط . 

فيروس كرونا ظهر قبل كده ف مصر واختفي الكلام عنه وبعدين ظهر تانى مع بداية 2020 بس قولنا فيروس زى اى فيروس هيعدى بس الموضوع قلب بجد وابتدا يسمع ف العالم كله بداية من الصين مرورا بإسبانيا وإيطاليا وإيران ووصل مصر مع السياحة الترفيهية والدينية وابتدا يقرب من المحافظات التانية كل ده الواحد مكنش شاغل باله لحد ما ضرب محافظتى والمركز اللى انا منه بالتحديد تفشى ف القري اول حاجة ساعتها حسيت برعب وقتها أنى خلاص ع شفا حفرة من نار يا نجيت يا وقعت فيها.. الحظر افترض ع المحلات والكافيهات والمطاعم والشغل بقي بنص القوة حتى انا نفسى اجازة من الشغل بس السؤال هنا هل الفيروس ده فعلا زى ما سمعنا انه اتلعب ف DNA بتاعه هل فعلا ليه علاج طب ولو ليه هيبقي تكلفته شكلها ايه؟ ياخد كام وقت لما يتنفذ ع أرض الواقع ونخلص من كابوس كرونا!